Return to site

الشعور بالاكتفاء

· مقالات

من أروع انواع المشاعر اللى ممكن الانسان يحس بيها... هو الشعور بالاكتفاء
و ده سهل اوى.. و صعب اوى...
"سهل لأنه بييجى بمجرد ما تشعر انه لديك " ما يكفي..
و صعب لأن مش سهل نوصل للمرحلة دى

طيب ايه الفرق بين الاكتفاء وبين الاستغناء؟
................................................................
الاستغناء لو معناه استغناء عن أشياء او عن حاجات عايزاها يبقى شعور طيب ، أما لو معناه استغناء عن الناس او اكتفاء بنفسى فقط وانى مش محتاجة حاجة من حد ومش محتاجة حد واقدر اعمل كل حاجة لنفسى وبنفسى فده شعور سيىء وخبيث جدا ومذموم ،
بالرغم انه ممكن يبدو كويس ويبدو استقلالية وقوة. لكن حقيقته غير كده وهو من أمراض القلوب الخبيثة التى قد يصعب اكتشافها لأنها تتخفى فى زىّ القوة والاعتماد على النفس.

اما الاكتفاء حاجة تانية:
اكتفاء باللى عندى فعلا،
احساس بنعم ربنا عليا واحساس بقيمتها واستمتاع بيها،
وعدم رغبة فى حاجة افضل او اكتر.
مكتفية بشكلى كده ومش عايزة ابقى أجمل،
مكتفية بجوزى اللى فيه عيوب ومميزات ومش بادّور على حياة شبه الأفلام والقصص ( طبعا ده لا يعنى عدم محاولة علاج مشاكل او كده..) ،
مكتفية بولادى كده زى ما هم ومش باقول يا ريتهم حلوين زى ولاد فلانة او اذكياء زى ولاد فلانة او يا ريتهم يدخلوا كلية الطب...


المفهوم ده شائك شوية لأنه ممكن نفهم منه انه عدم طموح،
هو الطموح حلو بس بحدود وفى مجالات معينة،
مش لازم يبقى عندى طموح انى ابقى اجمل واحدة، ولا طموح انى ابقى فى غاية الثراء اكتر بكتير من احتياجى، ولا طموح فى ولادى بشكل يرضينى انا مش عشانهم هم...
الاكتفاء ببساطة هو الرضا بما قسمه الله لى
والشعور بنعم ربنا عليّأ وعدم جحودها وكفرها

 

All Posts
×

Almost done…

We just sent you an email. Please click the link in the email to confirm your subscription!

OK