Return to site

كلمات قاسية

عن الأشخاص اللى كلامهم جاف وقاسى

· مقالات

الأشخاص اللى بيحدفوا طوب

طبعا معروفين 😊

كلام جامد ملوش لزمة

عدم مراعاة لإحساس الآخرين

اندفاع فى الكلام ويتقال بأسلوب مؤذى

عصبية شديدة وسرعة غضب غير طبيعية

كل ده سبببه ايه؟

هل الشخص ده قاسى وسىء؟ لأ مش شرط

لأنه ساعات بيفوق من ثورة الغضب دى ويندم على اللى قاله أو عمله

ويحس أن عصبيته دى موجهاه فى سكة غلط

بس هو مش قادر يسيطر عليها

طيب ليه أصلا بيعمل كده؟

هى مجموعة من الأسباب غالبا بتبقى موجودة مع بعض

وبتتشابك وبتؤدى لوجود شخصية عصبية وعدوانية وصعبة التعامل

زى ايه الأسباب دى؟

أولا الشخص ده عنده اعتقاد ان اللى بيقوله دايما صح.. عنده درجة عالية من العناد واعتداد زايد برأيه

بيخليه مش قادر يتقبل أى رأى تانى

وحتى لو سمع رأى تانى بيبقى شايف غالبا ان اللى قدامه غلطان

ثانيا بيبقى معتقد ان طالما أنا اللى صح واللى قدامى غلط يبقى أنا اللى لازم أقود الموقف.. لأن أنا اللى فاهم صح وانا اللى هاتصرف صح.. يعنى بيمارس نوع من الوصاية على الآخرين بدون ما يدرك فى الغالب..

ثالثا حساسيته لمشاعر الآخرين قليلة.. يعنى ممكن يبقى شايف انه بيضغط على اللى قدامه.. بس مش مشكلة .. المهم الموقف يمشى فى الاتجاه الصح من وجهة نظره.. مرة شفت واحدة بتتكلم عن صديقتها بالطريقة دى.. هى فعلا الصديقة لها طبع مش ظريف كده انها بتفضل تعيد وتزيد فى مشاكل وقصص قديمة... صاحبتها بتعمل ايه؟ ببساطة بتزعق فيها ... وفرحانة باللى بتعمله ومعتبراه انجاز وكانت بتحكى الموقف بفخر: ان كل ما فلانة بتبدأ الاسطوانات بتاعتها باهبّ فيها فبتسكت على طول!!! عشان كده ساعات الشخص ده بيتعمد يزعق ويتنرفز عشان يضغط على الآخرين لتنفيذ رأيه اللى هو شايفه صح.. أو لتنفيذ حاجة لمصلحته لأنها مهمة بالنسبة له وأهم من مشاعر أو مصالح الآخرين.

رابعا ساعات بيبقى عنده درجة عالية من البرفكشنزم أو الرغبة فى الكمال.. مش عايز يغلط.. مش عايز يقصر فى حاجة.. عايز كل حاجة مظبوطة جدا... وبالتالى بيضغط على نفسه عشان يقوم بواجباته على أكمل وجه.. وبيبقى فعلا مضغوط وعصبى اغلب الوقت.. وكمان بيضغط على الاخرين عشان يعملوا الصح من وجهة نظره لأنه عايز كل حاجة صح

خامسا بيبقى عنده غالبا نوع من القلق والخوف.. خوف من فقدان السيطرة ومن الفوضى واللخبطة ومن أن الدنيا تفاجئه بحاجات مايكونش قدها ومايعرفش يتعامل معاها... عشان كده اتعود من صغره يعمل حساب لكل حاجة.. ويخطط لكل حاجة.. وينظم كل حاجة.. ويظبط كل حاجة.. لازم كله يبقى مظبوط.. لازم كله يبقى تحت السيطرة

سادسا الشخص ده غالبا بيبقى سيطرته على انفعالاته ضعيفة جدا.. بيتعصب بسرعة.. بيتنرفز كتير.. مش بيعرف يسيطر على غضبه.

بيعمل ايه بقى؟ طول ما هو بره البيت أو مع ناس اغراب بيبذل مجهود جامد عشان يفضل هادى ورزين

ودى حاجة مرهقة طبعا بالنسبة له.. كأنه عايش بطباع مختلفة او بشخصية مختلفة

أول ما بيرجع بيته.. أو أول ما بيتعامل مع المقربين منه.. بيخلع الشخصية دى وبيرجع لطبيعته وبيسيب نفسه لانفعالاته الطبيعية

وبالتالى بنلاقيه مع المقربين دايما عصبى وصوته عالى وكلامه حاد

انما مع الآخرين مؤدب وهادى

ده مش لأنه بيمثل او بيدّعى

ده لأنه مش بيقدر يفضل مسيطر على نفسه طول الوقت

........................

طيب السؤال المهم بقى:

نتعامل ازاى مع الشخصية دى؟

الحقيقة ان دى من أصعب التحديات

الشخصية دى فى الغالب بيبقى صعب انها تتغير

ليه؟ لأن وعيها بنفسها قليل

مش مقتنعة اصلا ان فيه مشكلة

الآخرين هم اللى كسالى أو أغبياء أو مش عارفين يتصرفوا أو مستفزين.. أو ...أو...

زى ما قلنا هو اصلا درجة حساسيته لغيره قليلة

وذكاؤه العاطفى مش أوى

بالرغم انه فى الغالب بيبقى ذكى جدا عموما.. لكن فى العلاقات لأ

ذكى فى الدراسة.. شاطر فى شغله... لكن العلاقات هى نقطة ضعفه

عشان كده من ضمن الحلول المتاحة اننا نحاول نخليه يشوف مشاعرنا واحتياجاتنا

ده مش بيبقى سهل

لأنه بيعتبر ده محاولة للعناد أو محاولة للسيطرة عليه وفرض إرادتنا

وهو بيحب انه هو اللى يفرض إرادته ويبقى القائد دايما

لكن دى حاجة لازم تتعمل .. لازم نفهّم الشخصية دى أن انتى كمان ليكى مشاعر وليكى رغبات وليكى احتياجات وليكى مصالح.....

طيب هل النتيجة مضمونة؟

بصراحة ... لأ

بتعتمد على درجة نضج الشخص ده واستعداده لتزكية نفسه والتخلص من العيوب

فى النهاية نحن لا نملك أبداااااا أننا نغير شخص

هو الوحيد القادر انه ياخد قرار انه يتغير

لكن نقدر نغيّر ردود أفعالنا التقليدية ونحاول نوجه دفة الحديث لما يفيدنا

أيضا من الحلول المتاحة أننا نكون أكثر حسما وقت اللزوم

وبدون أى عدوانية ولا عصبية

يعنى ايه أكثر حسما؟

يعنى نرفض التجاوزات

ونؤكد على الحقوق

وبمنتهى الهدوء والذوق

............................

طيب سؤال تانى مهم: اعمل ايه لو أنا الشخصية دى؟

ببساطة... خدى الأمور ببساطة 😊

اعرفى ان مش لازم كل حاجة تبقى تحت السيطرة

مش لازم كل حاجة تبقى برفكت

مش لازم رأيى يكون صح

وحتى لو صح مش لازم يناسب كل الناس

ادّى مساحة من الحرية للآخرين

سيبيهم يتصرفوا بطريقتهم

حتى لو هيغلطوا

احنا مش أوصياء على حد

ولا مطالبين اننا نقود العالم للأفضل

احنا فقط محتاجين نعيش بهدوء وسلام ومودة

اطمئنى... واسترخى....

طبعا خدى بالأسباب... لكن اعرفى أن الكون له رب يدبره

ومهما حاولتى تظبطى كل حاجة... المكتوب سيكون

موضوعات مهمة

العلاقات السامة

https://www.imansalah.com/blog/4de7077a833

ليه عايز ياخد بس؟

https://www.imansalah.com/blog/d4b75ba17c2

الشعور بالاكتفاء

https://www.imansalah.com/blog/421791474de

السلام الداخلى

https://www.imansalah.com/blog/7ee5ebf5b78

العلاقات المرهقة

https://www.imansalah.com/#gallery_1-1

العلاقات المرهقة 2

https://www.imansalah.com/#gallery_1-2

All Posts
×

Almost done…

We just sent you an email. Please click the link in the email to confirm your subscription!

OK