· مقالات

من وهو صغير.. كان جواه غضب شديد مكبوت..
الأهل كانوا بينتقدوه كتير وبيزعقوا كتير وبيتحكموا فى حاجات كتير .. وهو مش قادر حتى يعترض
دايما ماتردش.. ماتعيطش.. ماتقاوحش..
فضل الغضب يتركز ويتكتل جوه نفسيته
وحش مقفول عليه
لحد ما كبر..
ببساطة، لقى نفسه فجأة قادر يطلع الوحش من السجن اللى كان محبوس فيه
لكن الوحش ده كان توحش أكتر
مش مجرد غضب عادى
ده بقى غضب على كل حاجة وأى حاجة
غضب شديد على ولاده.. أكتر بكتير من اللى الموقف يستحقه
غضب شديد على مراته ( أو على جوزها) بالرغم ان مفيش سبب منطقى للغضب ده
غضب شديد على الدنيا والظروف والأحوال والناس
لو تجاسر وصارح نفسه هيلاقى أنه جواه غضب على القدر!! بس طبعا هو مش قادر يصارح نفسه بكده
بيكتفى أنه يحوّل الغضب ده لأى حاجة تانية
زمايله المستفزين.. المدير اللى مش مقدره.. العيال المتعبين.. الزوجة ( او الزوج) المستفز المقصر دايما.. أحوال البلاد والعباد... أى حاجة وكل حاجة...
وبعدين؟ آخرتها ايه؟
هيحاول يسيطر على الغضب طبعا
الحقيقة أنه مش شرط يحاول أصلا
فيه مشكلة تانية
الغضب بقى بيحقق له فايدة!!!
طبعا، محدش بيقف قدام القطر!!
الناس كلها بتنحنى لحد ما العاصفة تمر
وأكيد العاصفة حاسة بكده وجواها زهو بقوتها
ده غير المكاسب والفوايد : اللى أنا عايزه بيتعمل

تعالوا ننقذ نفسنا.. وننقذ ولادنا
المشكلة أن دى سلسلة ممكن تكون بدأت من عشرات او حتى مئات السنين!!
بيتم توارث اللعنة دى بشكل غريب
ماهو بقى كده عشان أهله كده
وولاده لما يكبروا هيبقوا زيه..
يعنى سلسلة مش بتقف
ولازم حد يكون حكيم وعاقل ويعرف يوقفها
جربت توقفها؟ جربت تفهم أسباب تصرفاتك وايه الدوافع اللى ممكن تكون وراها؟
فيه أسباب ايه تانى للغضب اكتشفتها من تحليلك لنفسك؟

All Posts
×

Almost done…

We just sent you an email. Please click the link in the email to confirm your subscription!

OK